Panton Aceh Cinta ngon Rindu

Oleh:   Rahmat   |   November 20, 2019

Bagikan Tweet Share Email

Panton Aceh Cinta dan Rindu. 

Meu ie U muda, mameh e po long
Asoe bak Punggong, cukob meusilak
Lon tuleh ca-e, sira lon ranggong
Si bungong kuntom, cukob that lagak

Keude blang mane, han sare bubong
Oh ta-eu tampong, suwah ta sangak
Rindu lam hate, jiek lam jantong
Galak hate lon, keu adek lagak

Keude Blang Bladeh, ji meukat jagong
Di kuta Aron, meukat boh salak
Atei lon kalon, ji tron lam jantong
Sam poe u uboen, ji teuka galak

Si mirahpati, di ateuh buboeng
Jipo that lambong, wab siwah nak tak
Ka lheuh lon pegah, bak wali karong
Keu adek payong, tuha lon yue Jak

Di coeng bak mane, subra su lutoeng
Ateuh keurundoeng, reungkah seumurak
Pajan keuh loen me, si rante kalong
Meu chen that di long, keu dara lagak

Alue keutapang, kayem su buroeng
Puncak geu rudoeng, ureng peh tabak
Tuboeh loen ceukang, badan sang lungkoeng
Gadeh lam gampoeng, brat that loen galak

Ulon cah rimba, neuk pula jagoeng
Teurbeh that siroeng, lam gle Peureulak
Bulat that muka, mancoeng boeh idoeng
Bak mieng na lusoeng, mameh meu sigak

Di Banda Aceh, na tutue peunayoeng
Di keude Geudoeng na boh cempeudak
Pajan keuh jadeh saheh si karoeng
Meuhan nafah loeng, ji teuka seungkak

Kota Blang Pidie meuriti juroeng
Keude Lhok Niboeng, meu kat martabak
Oh malam leupie, meu sap jantoeng
Kana soe tuloeng, tiek ija sawak

Di dalam laot, jaloe meu apoeng
Nahkoda sandroeng, lake seu mipak
Hate loen salot, dek meu keu-rudoeng
Jeulbab bak ubon, hantom meu silak

Tutue Kuta Blang, jinoe ka lambong
Watei ie ji tron, katajam jijak
Mubek tatulak, ka lamaran u long
Saweb hate long, cukob that galak

catatan: Pantun bahasa Aceh atau panton Aceh ini dikarang oleh seorang seniman bernama Tarmizi, warga gampong Tingkeum manyang, Kecamatan Kutablang Kabupaten Bireuen.